Karol Gwóźdź Siemianowice: Poeta, kibic, muzyk, przede wszystkim Ślązak

Karol Gwóźdź Siemianowice: W zdrowym ćele jest fest artystyczny duch - tak we skrůće idźe pedźeć uo Karolu Gwoźdźu - śymjanowickim muzyku, producynće muzycznym, kibicu Ruchu i poety cuzamyn. Zdo śe pedźeć - czowjyk kapela.

Karol zadebjutowoł literacko sztyry lata nazot, kjej wydoł swůj pjyrszy, a půki co jedyny tůmik poezyji "Myśli ukryte". Wtynczos było to jedno z pjyrszych wydawńictw uosobliwje poetyckich, kaj ńy ino teksty szkryfńynte były ślůnskům godkům, ale ku tymu użyto blank ślůskjygo alfabetu! - To jynzyk, kery nosza w duszy. Jest uůn uo wjela barzyj prostszy, myńij poplůntany we swoij formje, ńiźli jynzyk polski, nale to ńiczymu ńy zawodzo, coby szkryflać we tyj godce richtich poezyjo - godo Karol i prawi, co cołki czas bajstluje, ale půki co, ńy myśli wydować kolejnego tůmiku. - Ńy chca ajnfach wydować byle czego - podkreślo.

Kjej ńy szkryflo, tworzy i gro muzyka electro jako DJ Nail. Zaś jego nojwjynkszym sukcesym jest wydůńe pod swojim pełnym mjanym płyty "Tamte Czasy"... kero uostała wydano we Irlandyji!

Karol Gwóźdź Siemianowice: Poeta, kibic, muzyk, przede wszystkim Ślązak

- Mojo debjutancko płyta "Tamte Czasy" uostała wydano we irlandzkij wytwůrńi "Psychonavigation Records". Albům nagrany jest w stylu ambient, modern classical, czyli tako relaksujůnco elektrůńika, z dodatkjym mankuliji. Ku tymu dźynki Irlandii była szeroko dystrybucja. Płyta bez problymu idźe dostać tyż we Japůni - godo Karol Gwóźdź. - Ślůnski ambient suchajům we Skandynawi, Kazachstańe, Nowyj Zelandyji, Libi, Turcyji, a tyż Koreji Połudńowyj, aby take dostaja informacyje dźynki portalům społecznośćowym - uosprawjo artysta.
Co ćekawe, jedyn z kůnckůw, kery jest na płyće "Gůrnoślůnskje Tragedyje", uostoł wykorzystany we filmje fabularnym "Beat Girl" ze 2013 roku.

- Śedza terozki nad nowym albůmym, aji zdradza, co nad… dwůma! Atoli trocha to trwo, bo obok ambientu śedza tyż nad muzykům electro. Jestech ale dobrej myśli, co uobydwa wydańa powstanům jeszcze we tym roku - godo Karol.

Poza tworzyńym muzyki i szkryflańym poezyji we ślůnskim jynzyku, Karol jest tyż fest kibicym Ruchu Chorzów, kery ku tymu zbjero treski meczowe.

- Roz trefiła mi śe blank uoryginalno meczowo koszulka i uod tego momyntu zaczołech zbjerać meczůwki ze każdego sezůnu. Take małe hobby. Na teroz mům przeszło 50 růżnych meczůwek - wyliczo i dodaje, co wszyjskje idźe uobejrzeć w szpecjalnym internetowym muzyum pod adresem
www.fb.com/RuchChorzowMuzeum.

- Z perełek moga wymjeńić rzodkje treski z poczůntkůw lat 90-tych kjej spůnsorym był Samsung, treska z połowy lat 80-tych uod Waleszczyka, a tyż nojwjynkszy skarb czyli treska Darka Gęsiora ze finałowego szpilu Pucharu Polski ze 1996 roku, czyli strzelca jedynego tora, kery doł Ruchowi trzeći Puchar Polski - godo Karol i pado, co chćołby uzbjerać jak nojwjynkszy zbjůr meczůwek Ruchu.